Жаңғыру жағдайындағы қазақстандықтардың саяси сәйкестігі

Аңдатпа

Мақала қазақстандықтардың саяси сәйкестігіне жаңғыру процесінің әсерін зерттеуге арналған. Саяси сәйкестік елдің ұлттық бірлігі мен тұрақтылығын нығайтуда маңызды рөл атқарады, ал жаңғыру оның трансформациясына көп қырлы ықпал етеді. Жаңғыру саяси, экономикалық, әлеуметтік және мәдени өзгерістерді қамтитын ауқымды процесс ретінде қарастырылады. Авторлар саяси сәйкестіктің қалыптасуындағы тарихи және мәдени факторларды, сондай-ақ жаһандану, цифрландыру, білім беру реформалары және урбандалу сияқты қазіргі заманғы үрдістердің әсерін кешенді түрде талдайды. Зерттеу «Рухани жаңғыру» және «Мәңгілік ел» бағдарламаларының маңыздылығын атап өтіп, олардың жалпыұлттық құндылықтарды қалыптастырудағы рөлін көрсетеді. Жаһандану жағдайында ұлттық және этномәдени сәйкестікті сақтаудың өзекті мәселелері қарастырылып, осы үдерістің қоғамның тұрақты дамуы үшін маңыздылығы көрсетіледі. Зерттеу барысында сандық және сапалық әдістер қолданылып, сауалнамалар мен сұхбаттар арқылы қоғамдағы саяси сәйкестіктің негізгі аспектілері анықталған. Зерттеу нәтижелері саяси сәйкестікті нығайту үшін ұлттық сана-сезімді дамыту, этномәдени әр алуандылықты қолдау және азаматтық белсенділікті арттыру қажеттілігін көрсетеді. Қазақстандықтардың саяси сәйкестігіне әсер ететін негізгі факторлар ретінде цифрлық трансформация, білім беру реформалары, урбандалу және жаһандану аталып өтіледі. Сонымен қатар жастардың саяси қатысуы мен дәстүрлі құндылықтарды сақтау арасындағы тепе-теңдікті сақтау мәселесі талқыланады. Мақалада ұсынылған тұжырымдар ұлттық бірлік пен тұрақтылықты нығайтуға бағытталған мемлекеттік саясаттың тиімділігін арттыру үшін маңызды негіз бола алады.