Жапон жастары арасындағы абсентеизм азаматтық бірегейліктің өзгеруінің көрінісі ретінде

Аңдатпа

Мақалада елдің саяси өміріне жапон жастарының қатыспауы немесе пассивті қатысуы ретінде анықталатын абсентеизм құбылысы қарастырылады. Жас буынның сайлауға және саяси процестерге деген қызығушылығы жапон халқының қартаюына және олардың пайдасына көптеген әлеуметтік реформалардың қабылдануына байланысты айтарлықтай төмендеп келеді. Аталған жұмыста Жапониядағы жастардың сайлау мінез-құлқына әсер ететін себептер мен факторлар және осы құбылыстың салдары талданады. Бұл зерттеудің мақсаты – абсентеизм құбылысын жастардың саяси өмірге қатысудан бас тартуының әлеуметтік көрінісі ретінде зерттеу және оның пайда болуының алғышарттары мен детерминанттарын анықтау. Осы талдау барысында абсентеизмнің негізгі себептері, соның ішінде институционалдық реформалар, саяси жүйенің трансформациясы және жастардың саяси әлеуметтенуінің ерекшеліктері анықталды. Мақалада сонымен қатар 18 жасқа толған жапон азаматтарының сайлауға қатысудан бас тартуының және оған аз қызығушылық танытуының себептері қарастырылады. Сараптау жапон ғалымдарының зерттеулеріне және жапондық статистикалық деректеріне негізделген. Нәтижелер жас ұрпақтың саяси қатысу деңгейінің төмендеуі әлеуметтік-экономикалық және саяси-институционалдық факторлардың жиынтығына байланысты екенін көрсетеді. Мақалада құндылық бағдарларының өзгеруі және ортаның саяси көзқарастардың қалыптасуына әсері де қарастырылады. Бұл зерттеуді жастардың саяси белсенділігін арттыруға және мемлекеттік заңнаманы жетілдіруге бағытталған шараларды әзірлеу үшін пайдалануға болады. Онда саяси тетіктерді жас адамдардың мұқтаждықтарына бейімдеу және қоғамдық-саяси өмірге қатысуды ынталандыру қажеттілігі ерекше атап өтілген. Сонымен қатар, зерттеу нәтижелері жастардың саяси қатысуын арттыруға бағытталған тиімді стратегияларды әзірлеуге негіз бола алады.